Ka nisur ditën e sotme vaksinimi i efektivëve të policisë në stadiumin Kombëtar “Air Albani”.
Kryeministri Edi Rama i shoqëruar nga ministrja e Shëndetësisë Ogerta Manastirliu dhe Drejtori i Përgjithshëm i Policisë së Shtetit Ardi Veliu, ka inspektuar procesin e vaksinimit. Policia ka 11800 punonjës për t’u vaksinuar, ndërsa Garda e Republikës 1300 efektivë.
Vaksinimi i policëve ka nisur sot dhe në rrethe ndërsa do të merret doza e parë e vaksinës kineze Sinovac. “🧪👩🏼✈️👨✈️Arena Kombëtare – Nis vaksinimi i uniformave blu në të gjithë Shqipërinë😍”, shkruan Rama. Kryeministri tha gjatë lëvizjes se kishte lexuar një artikull të “Nju Jork Times”, në të cilin thuhej se “Sinovac ishte i pari në eficencë”.
Lajmi për vaksinimin e efektivëve të policisë u bë i ditur ditën e djeshme nga ministrja e Shëndetësisë, Ogerta Manastirliu në takimin që zhvilloi në zonat e Beratit. Kujtojmë se ditën e djeshme u vaksinuan edhe gazetarët e terrenit.
Ndërkohë vaksimi masiv i të moshuarve vijon në sheshin “Skëndërbej”, në kryeqytet dhe në zonat e caktuara në rrethe. Mesatarja e të vaksinuarve për një ditë deri më tani, ka qenë rreth 12 mijë persona. Gjithashtu më herët edhe ministri i Turizmit Blendi Klosi, ka bërë të ditur se së shpejti do të vaksinohen edhe stafet e turizmit, për të qenë gati për sezonin turistik.
