Kanë vazhduar protestat në Maqedoninë e Veriut për rastin “Monstra”. Familjarët e të dënuarve së bashku me shqiptarë të tjerë kanë kërkuar drejtësi për këtë rast
Sipas tyre 5 shqiptarët e dënuar janë të pafajshëm dhe i gjithë procesi ka qenë i montuar politikisht.
Protesta ka qenë paqësore dhe forcat e policisë nuk e ndaluan tubimin siç ndodhi disa ditë më parë. Protestuesit marshuan me thirrjet “Duam Drejtësi dhe në duar mbanin pankarta me mbishkrimet “Stop standardeve të dyfishta”.
Rasti “Monstra” ka të bëjë me vrasjen e pesfishtë që ndodhi të enjten e 12 prillit në vitin 2012 në Smillkovcë të Shkupit. Filip Slavkovski, Aleksandar Naqevski, Cvetanço Acevski dhe Kire Triçkovski nga Radishani si dhe Borçe Stevkovski nga Cresheva, u gjetën të vrarë me armë zjarri pranë liqenit të Hekuranës në Shkup.
Jo më larg se maji i atij viti, policia maqedonase nisi një aksion në Shkup duke arrestuar dhjetra shqiptarë. Kur deklaroi se përgjegjësit e vrasjes ishin kapur Ministrja e Punëve të Brendshme në atë kohë, Gordana Jankollovska theksoi se ata ishin të lidhur me ideologjinë fundamentaliste islame.
Pesë persona u dënuan me burgim të përjetshëm për ngjarjen: Fejzi Aziri, Haki Haziri, Alil Demiri Afrim Ismailoviç i cili u arrestua së fundi në Kosovë dhe vëllai i tij Agim Ismailoviç.
Për rastin “Monstra” lideri i atëhershëm i opozitës Zoran Zaev (tashmë kryeministër) deklaroi se të dënuarit ishin të pafajshëm dhe kjo provohej me anë të bisedave telefonike. Sipas Zaev në ngjarjen makabre kishin gisht struktura të caktuara që donin të nxisnin tensione e të rrisnin stabilitetin në Maqedoni. Megjithatë këto përgjime nuk bënë që të ndryshonte vendimi për dënimin e tyre.
