Numri dy i Partisë Socialiste, Taulant Balla, zhvilloi një takim me të rinjtë e qytetit të Elbasanit. Gjatë fjalës së tij, Balla u shpreh se ende nuk kanë arritur të bëjnë atë që PS-ja do për Elbasanin dhe për këtë arsye u duhet edhe një mandat i tretë.
“Ne ende nuk kemi arritur të bëjmë atë që ne duam të realizojmë për Elbasanin. Ndaj na duhet një mandat i tretë, një akt i ri për ti dhënë Elbasanit vendin që i takon”, tha Balla.
Balla teksa u ndal tek projekti më i fundit në Elbasan “ AutoMoto Park”, u shpreh se ky investim do të sigurojë shumë vende pune për të rinjtë në Elbasan.
“I vetmi nga Elbasani në listën e PD, është njëri që shquhet në CV e tij që ka vrarë brenda një dite 25 thëllëza. E vetmja parti që po punon çdo ditë për ta bërë Shqipërinë si gjithë Europa është Partia Socialiste dhe Edi Rama”, tha Balla.
Në përfundim të fjalës së tij Balla, i kërkoi të rinjve që votën e tyre ta investojnë tek Partia Socialiste, e cila sipas tij nuk i ka bërë keq interesave të Shqipërisë.
“Është Partia Socialiste e Shqipërisë që përgjatë gjithë 30 viteve tranzicion ka punuar për të transformuar vendin. Fati i keq i PS ka qenë se është dashur gjithmonë ta marrë qeverisjen e vendit pasi e ka shkatërruar Partia Demokratike”, tha Balla.
