Gazetarët e kanë detyruar Edi Ramën t’i rikthehet edhe njëherë premtimeve të dhëna para 8 viteve për 300 mijë vendet e reja të punës. Në emisionin “Epen” ai ka thënë se nuk janë hapur fiks aq vende, por janë 278 mijë. Rama tha se sipas Bankës Botërore Shqipëria është vendi i parë për punësimin e në rajon. Sipas Ramës, problem nuk është punësimi, por rritja e pagës për punën.
“Premtimi për 300 mijë vende punë? Nuk janë aq fiks por 278 mijë. Merrni shikoni letrat e shtetit, aty janë. Banka Botërore thotë që jemi të parët në rajon për punësimin. Nuk e them unë. Sot sfida nuk është tek vendet e punës. Sot nuk e gjeni dot një kompani të madhe që nuk po kërkon punëtor, por problemi është rritja e pagës për punën. Duhet të kalojmë në disa hapa të reja për të rritur pagat. Kjo është sfida. Për ne vende pune janë që ato që personi është në të bardhë”, tha Rama.
Më tej ai ka komentuar edhe rritjen e çmimeve, duke thënë se parimi është që po u rrit punësimi rritet edhe çmimi e konsumi. Madje ai është shfaqur i habitur kur iu tha se në Shqipëri nuk është rritur konsumi.
“Nuk dua të hyj në ekonomi por ka një parim; por u rritën punësimet, rritet çmimi dhe konsumi…
What? Në Shqipëri nuk është rritur konsumi? Nuk janë rritur çmimet? E ke të shkruar e zeza më të bardhë”, ka thënë Rama.
