Fushata elektorale ka nisur prej ditësh dhe po shkon në kulmin e vetë deri në përplasje fizike.Kanë qenë biznesmeni Gjergj Luca dhe kandidati i PD për deputet, Luçiano Boçi, ata që janë konfliktuar fizikisht. Ngjarja ka ndodhur në një local në zonën e Labinotit, ku Boçi ka qenë në një takim me banorët. Palët kanë bërë denoncimet në polici, ndërsa kanë ardhur dhe reagimet e tyre të para pas ngjarjes.
Luçiano Boçi është shprehur se ky ka qenë një aggression me motive politike, madje situate ka agravuar deri në kërcënim me jetë nga ana e Lucës.
“Ky është një agresion me motive politike. Dilja nga një takim për të biseduar me disa përfaqësues për problemet e zonës. Në dalje ky zotëri, vjen dhe agreson me fjalë dhe më pas më afrohet dhe tenton goditjen, pastaj e agravon situatën deri në kërcënime për jetën. Përgjigjen këta njerëz do ta marrin çdo ditë dhe përgjigjen e madhe do ta marrin në datën 25 prill me votën masive kundër këtij regjimi dhe kundër kësaj kaste skllavo-pronarësh, që ushtrojnë terror te njerëzit, skllavërojnë punëtorët me gjoja bizneset e tyre dhe guxojnë godasin. Unë isha i vetëm, ishte i shoqëruar me 2 a 3 badigardë. Bënte edhe filma sikur ishte i armatosur. Është bandit dhe mbrohet nga një kryebandit. Koha e banditëve ka marrë fund. Në 25 prill i zbresim nga froni i banditëve. Ka bërë hapat e para ligjorë për denoncimin. Është në moralin, në përgjegjësinë e Prokurorisë të vazhdojë hapat e tjerë. Luca ka histori të përplasur me njerëzit në Labinot, nuk i ka hyrë gjemb në këmbë. I duket vetja trim, i mbështetur nga kryeministri. Këto trima, pas 25 prillit do të jenë frikacakët që do tu luten njerëzve për mëshirë”-tha Boçi.
Nga ana tjetër biznesmeni Luca është shprehur se Boçi e ka provokuar dhe e ka sharë e madje i ka marrë dhe telefonin.
“Rozafa i kërkoi bashkia të bëjë një investim. Shkollën e pikturoi, ata nxorën njerëz për të bllokuar rrugën. Erdhën me parulla 2-3 hera te dera dhe si kam thënë asnjë llaf. Erdhi provokoi, shau. Unë isha duke pirë kafe. Më provokoi. Boci është rrugac. Më e bukura është që më ka grabit dhe telefonin. Më ka rënë telefoni në tokë. Ishalla policia i ka morë kamerat dhe ta zbardhë. Më ka morë dhe telefonin. Edhe kamarieri që ka qenë aty e ka parë që ma ka marrë telefonin. Për zotin, unë kam një shenjë që me ta kallxu ty do iu binte telefoni në shesh,”– ka thënë Luca.
