Ditën e djeshme policia e Tiranës njoftoi se kishte arrestuar 7 persona, në lidhje me një skemë mashtrimi prej disa miliona euro që ishin përfuituar në mënyrë të padrejtë. Më vonë u njoftua se një nga të arrestuarat ishte drejtoresha e filialit të fondacionit Besa, Albana Imami.
Sipas skemës së mashtrimit, klientët paraqiteshin vetëm në momentin kur u hidhej kredia në llogari, bënin tërheqjen e lekëve në banka dhe nga shuma e përfituar e kredisë.
Këta klientë përfitonin 25 deri në 35% të shumës së kredisë dhe pjesa tjetër përfitohej nga Drejtoresha e degës, Oficeret e Kredisë dhe Sekserët që siguronin klientët dhe në përfundim të këtij procesi nga Drejtoresha e degës lëshohej një vërtetim fiktiv, sikur e gjithë shuma e kredituar ishte likuiduar nga klienti.
Policia njofton se drejtoresha Imami ka marrë shuma të mëdha valute me interes nga persona të ndryshëm për të mbuluar këtë skemë mashtrimi, të cilat kapin vlerën deri në 1.7 milion euro.
Kjo skemë mashtrimi ka prekur mbi 800 persona. Kjo çështje është hetuar për më shumë se një vit, për të bërë të mundur edhe arrestimin e këtyre personave me në krye drejtoreshën Imami.
Janë dashur më shumë se dy denoncime zyrtare, pas të cilave Policia të vepronte menjëherë dhe të kërkonte gjurmim përmes telefonit të Imamit dhe personave të tjerë të implikuar.
