Pas tetë muajsh në arrati, vetëm dy ditë qëndroi në qeli. Artur Terziu, pronar i “Bar Barons”, ka përfituar nga gjyqtari Paulin Cera masën e detyrim paraqitje, pasi u rrëzua akuza për “vrasje në rrethana cilësuese”.
Pallati ku ndodhej lokali i Terziut në Durrës u shemb gjatë tërmetit të 26 nëntorit dhe banorët akuzuan menjëherë atë si shkaktarin kryesor, pasi kishte ndërhyrë në muret e pallatit. Dy gra humbën jetën, ndërsa Terziu u shpall në kërkim nga policia.
Pas tetë muajsh, Policia njoftoi se arrestoi po në Durrës Artur Terziun dhe pas dy ditësh ai lirohet nga gjykata.
Tashmë pronari i lokalit “Barons” akuzohet për falsifikim dhe ndërtim pa leje, pasi ekspertiza ka dalë në konkulzionin se pallati nuk është shembur për shkak të ndërhyrjes në kollona, por për shkak të cilësisë së dobët të betonit.
Por nuk është vetëm Artur Terziu që lirohet, por edhe çifti Arben dhe Dëshira Qato, pronarët e ish-Vila Palma, e shembur gjithashtu gjatë termetit. Edhe për ata është vendosur detyrim paraqitjeje nga gjykata.
Në gërmadhat e Vila Palamës humbi jetën babai i Arben Qatos, ndërsa u nxorr i gjallë djali i tij, Klajdi Qato.
