Një zjarr tragjik ka përfshirë një hotel 12-katësh në provincën Bolu të Turqisë, duke shkaktuar të paktën 76 të vdekur dhe shumë të plagosur.
Dy persona humbën jetën pasi u hodhën nga ndërtesa për t’i shpëtuar flakëve.
Zjarri ka shpërthyer gjatë një periudhe të ngarkuar, kur hotelet ishin plot me vizitorë për shkak të pushimeve dimërore shkollore.
Sipas ministrit të Brendshëm turk, Ali Yerlikaya, mbi 50 persona u plagosën, ndërsa ende janë duke u identifikuar viktimat.
“Zemrat tona janë thyer. Jemi në zi,” u tha Yerlikaya gazetarëve jashtë hotelit. “Duhet ta dini se kushdo që është përgjegjës për shkaktimin e kësaj dhimbjeje nuk do t’i shpëtojë drejtësisë,” shtoi ai.
Hetimet për shkak të zjarrit kanë nisur dhe janë arrestuar nëntë persona, përfshirë pronarin e hotelit.
Zjarri dyshohet të ketë nisur në restorantin e hotelit dhe është përhapur me shpejtësi në ndërtesë.
Në momentin e shpërthimit të zjarrit, hoteli kishte 248 mysafirë të regjistruar.
Yerlikaya thotë se 45 nga 76 personat e konfirmuar të vdekur janë identifikuar, ndërsa përpjekjet për të identifikuar viktimat e mbetura po vazhdonin.
Trupat e të identifikuarve iu dorëzuan familjeve të tyre.
Ndërsa 17 të tjerë u trajtuan menjëherë dhe u liruan nga spitali, pasi kishin marrë vetëm plagë të lehta, sipas ministrit turk të Shëndetësisë Kemal Memisoglu.
Një mysafir që qëndronte në katin e tretë të hotelit, u tha mediave turke se kishte kaos në katet e sipërme, ndërsa të ftuarit e tjerë u përleshën duke u përpjekur të arratiseshin.
“Njerëzit në katet e sipërme po bërtisnin. Ata varën çarçafë… disa u përpoqën të hidheshin,” tha Yelkovan.
Dëshmitarët dhe raportet sugjerojnë se sistemi i zbulimit të zjarrit në hotel nuk ka funksionuar, dhe veshja prej druri e jashtme mund të ketë përshpejtuar përhapjen e flakëve.
“Gruaja ime ndjeu erën e djegies. Alarmi nuk ra”, tha Yelkovan. “Zbritëm shkallët dhe dolëm jashtë”.
Zjarri ka shkaktuar një valë tronditjeje në Turqi dhe hetimet për shkaqet dhe përgjegjësinë e ngjarjes janë ende në vazhdim.
Presidenti turk Rexhep Tajip Erdogan shpalli një ditë zie kombëtare që do të mbahet të mërkurën. Ai shtoi se të gjithë flamujt në ndërtesat qeveritare dhe misionet diplomatike turke jashtë vendit do të ulen në gjysmë shtizë për të nderuar viktimat.
Për fat të keq morëm një lajm shumë të trishtuar këtë mëngjes nga Bolu, Kartalkaya. Vëllezërit dhe motrat tona u vranë dhe u plagosën në një zjarr që shpërtheu në një hotel.”
