Bashkimi Europian u ka bërë thirrje qytetarëve të tij që të sigurojnë furnizime jetike dhe ushqime për të paktën 72 orë, në rast të një krize të mundshme, përfshirë edhe një situatë lufte.
Paralajmërimi vjen nga Komisioni Europian, duke ngritur pyetjen se çfarë masash sigurie mund të merren në vende si Shqipëria në një skenar të ngjashëm.
Në këtë kontekst, mendja të shkon te bunkerët e ndërtuar gjatë regjimit komunist, një rrjet prej rreth 174 mijë strukturash të shpërndara në të gjithë territorin e Shqipërisë, të ngritura midis viteve 1975 dhe 1985.
Eksperti i sigurisë, Faik Basha, e sheh këtë thirrje të BE-së si pjesë të një përgatitjeje të gjerë për menaxhimin e krizave, qofshin ato natyrore, pandemike apo edhe konflikte të mundshme.
“Kjo nuk bëhet për të krijuar panik, por për të ndërgjegjësuar qytetarët dhe institucionet që duhet të jenë të gatshme për çdo emergjencë. 72 orë janë një periudhë kritike, e cila u lejon autoriteteve dhe ndihmave ndërkombëtare të ndërhyjnë për shpëtimin e jetëve,” shpjegon ai.
Sa i përket Shqipërisë, sipas Bashës, institucionet shtetërore, përfshirë ekipet e emergjencave dhe ushtrinë, duhet të hartojnë një plan strategjik për edukimin dhe përgatitjen e qytetarëve.
Ai thekson se shërbimi i detyruar ushtarak mund të jetë një hap i dobishëm për të rritur aftësinë e vendit në përballimin e emergjencave në mënyrë më efikase dhe me kosto më të ulët.
