Ditën e djeshme si pasojë e një atentati me armë zjarri ka mbetur i plagosur Erion Hasanbelliu alias Mikel Rakipllari. Hasanbelliu u qëllua dje me të paktën 6 plumba përpara hyrjes së një hoteli pranë qendrës De Brouckèreplein, në Bruksel. 43-vjeçari ka qenë duke ecur në këmbë, në momentin kur autorët, të cilët dyshohet se e kishin përndjekur për një kohë të gjatë, i afrohen dhe e qëllojnë. Deri më tani sipas mediave vendase, ende nuk ka asnjë gjurmë të autorëve që mund të kenë kryer këtë krim. Ndërkohë dëshmitarët okularë kanë qenë të shumtë dhe mendohet se ngjarja është filmuar nga kamerat e sigurisë së hotelit pranë të cilit ka ndodhur ngjarja. “Nuk e kemi idenë se kush është viktima, por kamera e sigurisë së hotelit ka filmuar gjithçka. Kolegu im e pa që ndodhi dhe është në shok”, thotë një punonjës i hotelit. Sipas dëshmitarëve i plagosuri ishte në gjendje të rëndë dhe se emergjencat erdhën menjëherë pas ngjarjes. Faktin se i plagosuri nuk është mirë, e konfirmon edhe prokurori publik i Brukselit. “Ai u godit nga gjashtë plumba në shpinë dhe në të pasme. Ai u operua menjëherë dhe është ende në rrezik për jetën” tha Martin François, zëdhënës i prokurorisë publike të Brukselit.
Ndërkohë përsa i përket identitetit të autorëve, sipas dy dëshmitarëve okularë, të cilët ndodheshin pak metra larg vendit të krimit, “Ishin dy burra pak më të rritur, njëri qëlloi papritmas tjetrin disa herë dhe ikën në një rrugë anësore në të majtë të hotelit. Njëri ishte tullac, trupmadh”, kujton gruaja.
