Policia e Vlorës mëngjesin e sotëm ka vënë në pranga një 42 vjeçar i cili ishte në kërkim për trafikim dhe prodhim droge.
Në njoftimin e bërë nga policia e Vlorës, Agron Velaj u kap në zonën e Novoselës.
Më parë 42 vjeçari, Velaj ishte dënuar nga Gjykata e Vlorës me 6 vite burg për prodhim dhe shitje të lëndëve narkotike në bashkëpunim.
Kjo ngjarje i referohet vitit 2015, kur në banesën e Agron Velaj, u gjet dhe u sekuestrua një sasi e konsiderueshme me lëndë narkotike canabis sativa (150kg) .
Njoftimi i plotë nga policia
Finalizohet një tjetër operacion policor për kapjen e personave në kërkim. Gjatë operacionit policor të koduar “Novosela” u kap dhe u vu në pranga i kërkuari në fushën e narkotikëve, i dënuar me 6 vite burg. Specialistët për Hetimin e krimeve në Komisariatin e Policisë Vlorë, në vijim të punës për kapjen e personave në kërkim dhe vënien e tyre para përgjegjësisë penale, si dhe në bazë të informacioneve të marra në rrugë operative për vendndodhjen e një personi të kërkuar dhe të dënuar për veprimtari kriminale në fushën e narkotikëve, organizuan dhe finalizuan operacionin policor të koduar “Novosela”, në kuadër të të cilit u bë kapja dha arrestimi i shtetasit në kërkim:
Agron Velaj, 42 vjeç, banues në fshatin Mifol, Vlorë. Ky shtetas u kap në zonen e Novoselës, pasi Gjykata e Vlorës e ka dënuar me 6 vite burg, për veprën penale “Prodhimi dhe shitja e narkotikëve” kryer në bashkëpunim. Ngjarja i referohet muajit janar të vitit 2015, kur u gjet dhe u sekuestrua një sasi e konsiderueshme me lëndë narkotike cannabis sativa (150 kg), në banesën e shtetasit Agron Velaj. Materialet i kaluan Prokurorisë së Vlorës, për veprime të mëtejshme.
