Një ngjarje e rëndë tronditi ditën e sotme lagjen nr. 4 të Kavajës. Si pasojë e të shtënave me armë zjarri ka humbur jetën 50-vjeçari Ramazan Hasalliu.
Viktima po kthehej për në shtëpi me bukë në dorë. Fatkeqësisht ai është kapur nga plumbat të cilët i morën edhe jetën.
Tashmë në media janë publikuar edhe fotot e dy autorëve të përplasjes me armë zjarri në Kavajë, ku për 4 minuta bënë kërdinë në qytet.
Burime nga Policia e Shtetit bëjnë me dije se dy autorët janë dy vëllezërit Eljo dhe Eraldo Hyka. Të dy këta persona, dyshohet se kanë një të shkuar kriminale, pavarësisht moshës së re.
Sipas “dosja.al”, përplasja me armë ka nisur në një local, ku pas një sherri verbal midis dy grupeve, konflikti arriti në përplasje fizike. Shkaku i sherrit ka qenë një ofendim ndaj njërit prej vëllezërve Hyka.
Më pas, ata kanë dalë nga lokali dhe kanë nxjerrë armët. Konflikti degjeneroi në këtë situatë ku 7 persona janë të plagosur dhe 1 kalimtar ka ngelur i vdekur në vend.
Dy vëllezërit Eljo dhe Eraldo Hyka janë shpallur në kërkim.
