Riatdhesimi duket se është kthyer në një nga çështjet më të diskutuara, pasi shumë shqiptarë kanë mbetur jashtë kufijve pas mbylljes së tyre për shkak të Covid-19.
Mbrëmjen e sotme, ministrja e Infrastrukturës dhe Energjitikës, Belinda Balluku, e ftuar në “Open” ka thënë sot se procesi i riatdhesimit nuk do mbyllet këtë javë, por do vijojë ende, duke paralajmëruar një valë të tretë të riatdhesimit, pasi shumë qytetarë këkojnë të vijnë në vend.
“Unë mendoj se nuk do të mbyllet riatdhesimi as me valën e dytë, pasi do ketë gjithmonë raste që duan të kthehen. Ka pasur njerëz të sëmurë dhe nuk kanë mundur që të vinin me fazën e parë. Nuk do pritet me thikë ky proces, pasi është një proces dinamik dhe nuk mund të mbyllet dot në këtë moment”, tha Balluku.
Më tej, ministrja u shpreh se do ketë dhe fluturime nga Viena, për të grumbulluar shqiptarët si në Evropën Lindore, por dhe ata në SHBA e Kanada.
“Po mendojmë të shtojmë dhe një destinacion tjetër që do jetë Viena, pasi aty ka akses dhe nga vendet e tjera. Nga Viena është më lehtë të hyhet dhe pasi ka fluturime nga New York dhe nga Toronto, për t’i dhënë mundësi dhe shqiptarëve që jetojnë në SHBA e Kanada”, tha ministrja.
Si bëhet aplikimi:
- Fillimisht çdo emigrant që dëshiron të kthehet në atdhe duhet të rezervojë për 14 ditë hotelin në Shqipëri.
- Pasi është bërë rezervimi i hotelit, qytetari do të marrë një kod personal dhe përmes këtij kodi do të hyjë sërish në faqen e “Air Albania” ku do të bëjë dhe aplikimin dhe për biletën e ardhjes.
- Në karantinë në Durrës qëndrojnë për 14 ditë, ku 2/3 e shpenzimeve i paguan shteti, ndërsa qytetarët do të paguajnë 100 euro biletën dhe cdo ditë nga 7 euro për qëndrimin në hotel.
