Kryeminsitri Edi Rama ka folur mbrëmjen e sotme gjerësisht rreth paketës ekonimike, situatës aktuale në vendin tonë, si edhe parqyrimit të së ardhmes.
Në një lidhje me Skype për “Open”, Rama ka shpjeguar edhe masat që qeveria ka përgatitur për miratim në Kuvend, ku do ketë dënime deri në 15 vite burg për ata që janë të infektuar dhe provokojnë vdekjen e të tjerëve.
Sipas kreut të qeverisë, ndryshimet në Kodin Penal janë të nevojshme dhe dënimi me burg do të jetë për ata persona që janë të infektuar dhe thyejnë karantinimin.
“Në Kodi Penal aktual kemi edhe karantinimin e kafshëve, por të njerëzve nuk e ka parashikuar njeri, ndërsa sa i përket viteve mos më çoni në Korenë e Veriut, shkoni në Rumani, por që mos bëjmë ngatërresa, 15 vite është kur ke provokuar vdekjen e personave të tjerë, jo kur je i painfektuar. Ti nuk mund të jesh i painfektuar dhe të provokosh vdekjen e të tjerëve. Pra ti person i infektuar nuk rri në karantinë, por shkon në një event, ti patjetër do të shkosh 15 vite në burg. Kush nuk respekton masat, do të trajtohet si një person që rrezikon jetët e të tjerëve”, u shpreh ndër të tjera Rama.
Rama sqaroi se po ashtu, po diskutohet edhe hapja e restoranteve, bareve e vendeve të tjera publike, por çdo gjë do bëhet në kuadër të masave për parandalimin e përhapjes së koronavirusit.
Deri tani në vendin tonë janë regjistruar 23 viktima dhe 409 të prekur, teksa sipas ekspertëve situata po shkon drejt përmirësimit.
