Rreth 35 mijë qytetarë shqiptarë ndodhen aktualisht në procese gjyqësore për të fituar njohjen e viteve të punës përpara vitit 1993, një problem që po thellohet gjithnjë e më shumë.
Eksperti i pensioneve Kujtim Hoxha, në një intervistë për emisionin “Koha për t’u zgjuar” në News24, theksoi se bëhet fjalë për persona që nuk kanë dokumentacion të plotë për vitet e punës gjatë periudhës para viteve ’90.
Sipas tij, individët që pretendojnë këto vite pune duhet të paraqesin një sërë dokumentesh mbështetëse, si vërtetime banimi, dëshmi që tregojnë se nuk kanë qenë të ndëshkuar penalisht, si dhe për burrat, prova për kryerjen e shërbimit ushtarak të detyrueshëm.
Ai paralajmëroi gjithashtu se, nëse qytetarët heqin dorë nga këto gjyqe, rrezikojnë të humbasin njohjen e viteve të punës në moshën 14-18 vjeç një aspekt i parashikuar në ligjin e ri për pensionet.
Sa i përket pensionit minimal, Hoxha vuri në dukje se premtimi i qeverisë për ta rritur atë në 200 euro deri në vitin 2030 është larg realitetit ekonomik të vendit.
“Ka 35 mijë qytetarë në gjykata që janë në gjyqe për njohjen e viteve të punës para vitit 1993. Qytetarët që kanë mungesa të viteve në punë të para vitit 1993 duke plotësuar disa dokumente që vërtetojnë se kanë qenë banorë në zonën ku kërkojnë vitet e punës, del dëshmia e penalitetit që vërteton se nuk kanë qenë të dënuar, njëkohësisht edhe për meshkujt që kanë kryer shërbimi ne detyruar ushtarak. Nëse këta qytetarë tërhiqen nga këto gjyqe mund të penalizohen pasi mund të mos u njihen vitet e punës nga mosha 14 deri 18 vjeç sipas ligjit të ri.
Qeveria ka premtuar rritjen në 200 euro në pensionin minimal deri në vitin 2030, por kjo nuk plotëson interesat e qytetarëve, sepse ajo shifër prej 200 eurosh pretendohej në vitin 2025, pra tani për pensionin, pasi në vitin 2030 kjo shifër duke marrë parasysh inflacionin dhe zhvillime të tjera nuk do të plotësojë interesin qytetar”, u shpreh ai.
