Banorët e fshatit Zvezdë në Maliq dolën në protestë të dielën, duke kërkuar zgjidhje për një problem që i rëndon prej 30 vitesh, mungesën e ujit të pijshëm.
Kohët e fundit ka nisur një investim për ndërtimin e një ujësjellësi të ri, por banorët shprehen të pakënaqur dhe dyshojnë për cilësinë e punimeve.
Ata ankohen se puna po zhvillohet pa një plan të qartë dhe sipas tyre, mungojnë kanalizimet për ujërat e zeza, duke e bërë situatën edhe më shqetësuese.
Investimi që po realizohet konsiderohet nga banorët si i papërgatitur dhe jo profesional, duke e vënë në dyshim efikasitetin e tij.
Gjithashtu, ata shprehin zhgënjim për mungesën e interesit nga ana e përfaqësuesve të pushtetit lokal, të cilët deri tani nuk janë paraqitur për të dëgjuar shqetësimet e tyre. Banorët kanë frikë se pavarësisht investimit, për shkak të punimeve të dobëta, fshati do të vazhdojë të mbetet pa ujë të pijshëm.
