Tre fëmijë me shtetësi amerikane u deportuan javën e kaluar në Honduras, së bashku me nënat e tyre, përfshirë një 4-vjeçare që ishte në trajtim për kancer metastatik, sipas avokatëve të familjeve dhe organizatave të të drejtave civile dhe emigracionit.
Sipas një deklarate të Unionit Amerikan për Liritë Civile dhe Projektit Kombëtar të Imigracionit, deportimi përfshinte edhe një grua me djalin e saj 2-vjeçar dhe një tjetër me dy fëmijët, të moshave 4 dhe 7 vjeç.
Familjet u ndaluan gjatë takimeve rutinë me zyrtarët në Luiziana, në kuadër të Programit të Mbikëqyrjes së Paraqitjes së Intensifikuar.
Avokatët theksojnë se këto veprime ngrejnë shqetësime për shkelje të procesit të rregullt ligjor, në një klimë të ashpërsuar ndaj emigracionit nga administrata Trump.
CNN raportoi më herët për rastin e 2-vjeçares, e cila u ndalua me nënën dhe motrën e saj 11-vjeçare gjatë një kontrolli rutinë.
Një gjykatës vuri në dukje se, edhe pse nëna ishte pa dokumente, deportimi i një shtetasi amerikan është i paligjshëm dhe antikushtetues, duke cituar një precedent të vitit 2012. Ai caktoi një seancë dëgjimore për 16 maj.
Në një rast tjetër, një nënë që jetonte prej më shumë se dhjetë vitesh në Luizianën jugore u ndalua pasi dorëzoi pasaportat e saj dhe të fëmijëve gjatë një kontrolli pranë New Orleans.
Avokatja e saj, Erin Hebert, tha për CNN se nuk iu lejua ta shoqëronte familjen në takim dhe më pas nuk mori informacion për vendndodhjen e tyre.
