Teksa ndodhemi 3 ditë para zgjedhjeve lokale, presidenti Bajram Begaj dha një mesazh të rëndësishëm në lidhje me rëndësinë e këtij procesi.
Ndërkohë që ishte në një konferencë me presidentin e Polonisë, Begaj u shpreh zgjedhjet janë një moment shumë kyç për integrimin europian. Gjithashtu ai shpreson që partitë të mos shpërfillin thirrjen e tij, që sipas Begajt ka ndodhur më parë. Ndër të tjera Begaj thekson se administrata ka shumë rëndësi, në mënyrë që të kemi zgjedhje transparente, të lira dhe të ndershme.
“Zgjedhjet janë një moment kyç për procesin e integrimi evropian. Vetë zgjedhjet janë tregues i rëndësishëm i maturisë së sistemit tonë demokratik. 14 maji është sfidë për institucionet shqiptare, partitë poklitike dhe për vetë shoqërinë. Zgjedhjet nuk janë të partive politike por të të gjithë shqiptarëve. Unë shpresoj që partitë të mos shpërfillin qytetarët siç shpërfillën presidentin kur bëri thirrje që retorika të ishte qytetare, jo denigruese, jo armiqësore. Të kishte përplasje idesh dhe mendim dhe jo me retorikë të panevojshme. Unë dua të bëj një thirrje për pjesëmarrje në zgjedhje, si e drejtë kushtetuese por edhe detyrim moral dhe qytetarët për kombin dhe për veten tonë. Çdo qytetar duhet ta ushtrojë të drejtën e votës. Administrata ka shumë rëndësi. Çdo faktor duhet të angazhohet që të kemi zgjedhje transparente, të lira dhe të ndershme. Ky është një detyrim që ia kemi qytetarëve shqiptarë, që ka të bëjë me standardin zgjedhor më të lartë”, tha Begaj.
