Vendi ynë feston sot 79-vjetorin e Çlirimit,pasi me 29 nëntor të vitit 1944 u largua nga toka shqiptare gjermani i fundit. Ashtu siç e do tradita, edhe këtë vit do të ketë festime dhe organizime të ndryshme nga bashkitë dhe nga qeveria.
Sot krerët e shtetit, presidenti i Republikës, Bajram Begaj dhe kryeparlamentarja, Lindita Nikolla, kryeministri Edi Rama dhe politikanë të tjerë, kanë bërë nderimet e tyre në Varrezat e Dëshmorëve, duke vendosur dhe kurora me lule pranë monumentit ‘Nënë Shqipëri’.
Ndonëse kjo datë është ditë për përbashkim, politika në vend e feston e ndarë. Të majtët respektojnë 28 Nëntorin si Ditën e Pavarësisë dhe 29 Nëntorin si Ditën e Çlirimit, ndërkohë që të djathtët i përkujtojnë të dy festat më 28 Nëntor.
29 Nëntori e fitoi sërish statusin e Ditës së Çlirimit kur e majta erdhi në pushtet, në verën e vitit 1997, kur me një ligj të posaçëm u kthye në festë zyrtare.
