Presidentja e Kosovës, Vjosa Osmani, ka uruar shqiptarët për Ditën e Pavarësisë, duke e cilësuar këtë datë si një simbol të sakrificave dhe triumfeve historike të kombit. Në një postim në Facebook, Osmani theksoi se 28 Nëntori bashkon tri momente të rëndësishme historike që forcojnë identitetin shqiptar.
Postimi i plotë i Osmanit:
Më 28 nëntor, nderojmë historinë, flamurin dhe identitetin kombëtar, duke riafirmuar përkushtimin tonë për fuqizimin e shteteve tona.
28 Nëntori nuk është vetëm simbol i betejave dhe triumfeve tona, por edhe kujtim i sakrificave tona për të qenë të lirë, në paqe dhe krenarë.
28 Nëntori është simbiozë e tri momenteve historike që e lartësojnë kombin tonë: Ngritja e flamurit në Vlorë dhe shpallja e pavarësisë së Shqipërisë, dalja publike e UÇK-së dhe ditëlindja e komandantit legjendar Adem Jashari.
Të bashkuar në zemër e shpirt, le ta festojmë këtë ditë me krenari!
Edhe Sekretari amerikan i Shtetit, Antony Blinken, ka dërguar një mesazh urimi me rastin e 112-vjetorit të Pavarësisë. Përmes një postimi nga Ambasada Amerikane, Blinken shprehu vlerësimin për marrëdhëniet e ngushta mes Shqipërisë dhe SHBA-së, të bazuara në vlera demokratike dhe dëshirën për paqe dhe siguri.
“Në emër të Shteteve të Bashkuara të Amerikës, i shpreh urimet tona më të mira popullit të Shqipërisë teksa ju festoni 112-vjetorin e Pavarësisë. Marrëdhënia e ngushtë midis kombeve tona është e ndërtuar mbi vlerat e përbashkëta demokratike dhe një dëshirë reciproke për paqe dhe siguri”, thotë Blinken.
Ndërkohë, këngëtarja shqiptare me famë botërore, Dua Lipa, ka uruar Ditën e Pavarësisë përmes një postimi në Instastory. Ajo ka ndarë vargje nga Himni Kombëtar, duke shprehur krenarinë për origjinën e saj shqiptare.
Dua Lipa, e njohur për kontributin e saj në promovimin e imazhit të Shqipërisë dhe Kosovës, vazhdon të organizojë festivalin bamirës “Sunny Hill” dhe të prezantojë bukuritë natyrore shqiptare para miliona ndjekësve të saj.
