25 Nëntori shënon Ditën Ndërkombëtare kundër Dhunës ndaj Gruas, një ditë që synon të ngrejë zërin kundër një fenomeni global që vazhdon të marrë jetë dhe të cenojë dinjitetin e miliona grave. Sipas Kombeve të Bashkuara, deri në 70 për qind të grave në botë kanë përjetuar të paktën një herë në jetën e tyre dhunë fizike, seksuale ose psikologjike. Kjo ditë është kthyer në një thirrje botërore për ndërgjegjësim dhe veprim, duke denoncuar dhunën në familje, dhunën ndaj grave në situata lufte, si dhe rreziqet që ato përballin gjatë arratisjeve dhe krizave humanitare. Protestat e sotme në shumë vende kërkojnë t’i japin fund abuzimit, përdhunimit, martesave të detyruara dhe prostitucionit të detyruar.
Të dhënat globale vazhdojnë të tregojnë një realitet tronditës. Vetëm në vitin 2022, 48.800 gra në botë humbën jetën si pasojë e dhunës, sipas OKB. Edhe Gjermania përballet me shifra alarmante, ku sipas autoriteteve pothuajse çdo ditë një grua vritet nga partneri, ndërsa çdo tre minuta një grua apo vajzë përjeton dhunë. Raporti vjetor “Krimet specifike gjinore ndaj grave në vitin 2023”, i prezantuar nga Zyra Federale e Kriminalistikës, konfirmon rritjen e dhunës dhe sjell për herë të parë të dhëna mbi krimet e motivuara nga paragjykimet kundër grave. Gjatë vitit të kaluar u regjistruan 322 krime të tilla dhe 938 delikte vrasjeje apo tentativë vrasjeje ndaj grave, 9 më shumë se në vitin 2022.
Gjatë prezantimit të raportit, ministrja e Punëve të Brendshme të Gjermanisë, Nancy Faeser, theksoi: “Dhuna ndaj grave na prek të gjithëve. Ne shohim një femicid në Gjermani pothuajse çdo ditë. Çdo tre minuta një grua apo vajzë përjeton dhunë në familje. Çdo ditë më shumë se 140 gra dhe vajza bëhen viktima të një krimi seksual. Ato bëhen viktima sepse janë gra. Kjo është e padurueshme dhe kërkon angazhim të vazhdueshëm”.
Dita Ndërkombëtare kundër Dhunës ndaj Gruas lindi si nismë në vitin 1981 nga lëvizjet e grave në Karaibe dhe Amerikën Latine për të nderuar tre motrat Mirabal në Republikën Domenikane. Patricia, Minerva dhe Maria Teresa Mirabal u rrëmbyen, u përdhunuan dhe u vranë më 25 nëntor 1960 nga ushtarët e regjimit brutal të Trujillos. Në vitin 1999, OKB e shpalli zyrtarisht këtë datë si ditë globale kundër dhunës ndaj grave. Sot, ajo mbetet një thirrje e fuqishme ndërkombëtare për të mbrojtur të drejtat dhe jetën e çdo gruaje, duke e trajtuar dhunën ndaj tyre si shkelje të drejtpërdrejtë të të drejtave të njeriut.
