Numri i viktimave nga zjarret në zonën e Los Angeles është rritur në 24 persona, ku 16 janë raportuar të vrarë nga zjarri në Eaton dhe 8 në zjarrin në Palisades, sipas autoriteteve lokale.
Situata mbetet kritike, pasi zjarret vazhdojnë të përhapen, ndërsa meteorologët paralajmërojnë erëra të forta nga mbrëmja e së dielës.
Aktualisht, 16 persona rezultojnë të zhdukur dhe ekipet e shpëtimit janë fokusuar në nxjerrjen e mbetjeve në zonat e sigurta.
Sherifi i kontesë së Los Angelesit, Robert Luna, njoftoi se qentë po ndihmojnë 40 ekipe kërkimi në pastrimin e lagjeve të shkatërruara, duke shprehur shqetësimin se numri i viktimave mund të rritet gjatë kontrolleve shtëpi më shtëpi.
Ndërkohë, zjarret në Pyllin Kombëtar të Angeles janë rindezur përkohësisht, por ekipet e emergjencës kanë arritur të frenojnë përhapjen e tyre.
Zjarret kryesore, Palisades dhe Eaton, kanë përfshirë rreth 38,000 hektarë tokë dhe janë vënë nën kontroll përkatësisht me 11% dhe 27%. Zjarri Hurst, që ka djegur 799 hektarë, është pothuajse neutralizuar, me një kontroll prej 89%.
