Rasti i 22-vjeçares nga Kenia është sa enigmatik aq edhe tronditës, ku teksa erdhi me shume entuziazëm në Shqipëri për të punuar, pa vdekjen me sy. Ndërkohë që prej muajsh ndodhet në spitalin e Traumës në gjendje të rëndë, në mbështetje të saj qytetarët kenianë kanë hapur një llogari bankare, për të mbledhur një fond në mënyrë të tillë që të bëhet transferimi i saj në një spital të specializuar.
Theksojmë se aktualisht truri i saj ndodhet në gjendje vegjetative.
Mediat keniane pasqyrojnë ndër të tjera vizitën dje të dy përfaqësuesve të ambasadës keniane në Tiranë si dhe kërkesën e tyre për zbardhjen e ngjarjes. Qindra qytetarë nga Kenia dhe nga shtete të tjera po kontribuojnë për shpenzimet e saj mjekësore të cilat po rriten çdo ditë. Kontributi i faqes Gofund me ka arritur në 26,700,00 dollarë.
Ndërkohë që 22-vjeçarja dergjet në shtratin e spitalit, policia nuk e ka zbardhur ngjarjen dhe nuk ka arrestuar asnjë person të dyshuar për aktin mizor të dhunës ndaj vajzës keniane. Madje, Policia e Shtetit heshti për muaj të tërë për këtë ngjarje kaq të rëndë dhe u desh që mamaja e Joy-it të ngrinte alarmin, duke ardhur nga Kenia në Shqipëri, shumë e shqetësuar për vajzën e saj.
