Ditën e sotme Coronavirusi ka trokitur edhe në Kosovë, ku janë identifikuar dy rastet e para të prekura nga COVID-19 nga 15 testime të kryera deri tani.
Të infektuarit janë një shtetase italian 20-vjeçare dhe një 70-vjeçar nga Kosova dhe të dy ndodhen në gjendje të qëndrueshme, teksa nga ana tjetër, ka nisur puna për gjurmin e personave me të cilët mund të kenë patur kontakte dy pacientët e prekur.
Qeveria e Kosovës ka marrë një sërë masash për parandalimin e përhapjes së Coronavirusit, teksa janë ndaluar hyrje-daljet për të gjithë qytetarët në komunat e Klinës dhe Vitisë, ku u shënuan dy rastet.
Ndërkohë, dy ditë më parë kur nuk ishte shënuar ende asnjë rast, në mbledhjen e qeverisë këtë të mërkurë është vendosur mbyllja e institucioneve arsimore deri më 27 mars, pezullimi i përkohshëm i linjave ajrore dhe tokësore dhe pezullimi i të gjitha aktivitetet publike.
Nuk ka ende asnjë të infektuar, por Kosova merr masat ekstreme kundër Coronavirusit
Po ashtu është ndërprerë edhe transportit ndërurban dhe janë mbyllur kufijtë tokësor për të gjithë ata që hynë në Kosovë.
Ndërsa duke nisur nga 16 marsi do mbyllen të gjitha lokalet, baret e qendrat tregtare, ku përjashtim bëjnë vetëm dyqanet ushqimore dhe farmacitë.
Kurti bëri të ditur se kanë bërë edhe pezullimin e përkohshëm për të gjitha linjat e udhëtimit në Aeroportin “Adem Jashari”, ku përjashtim bëjnë vetëm fluturimet ushtarake apo medicinale.
Gjithashtu, qeveria ka vendosur që të reduktojë stafi në administratën publike, ndërkohë që institucionet private i ka urdhëruar që të organizojnë aktivitetet në atë mënyrë që punëtorët të mund të punojnë nga shtëpia.
Kurti nuk harroi as bizneset për të cilët tha se duhen ndihmuar, por theksoi mbi të gjitha është jeta e qytetarëve.
Për gratë shtatzëna që punojnë në sektorin shëndetësor, ministri i Shëndetësisë Vitia tha se kanë kërkuar nga menaxhmentet përkatëse të bëjnë përjashtime në raste të veçanta dhe të organizohen në atë mënyrë që të kursehen personat që janë më shumë të afektuar.
Ndërkohë në vendin tonë janë shënuar 33 raste dhe një viktimë, ndërsa numri total i viktimave në gjithë botës ka shkuar në mbi 5,400 persona dhe 145, 335 të infektuar.
