Këshilli i Ministrave ka shpallur datën 2 shtator 2025 si ditë zie kombëtare në nderim të regjisorit të njohur Dhimitër Anagnosti, i cili u nda nga jeta një ditë më parë.
Sipas protokollit shtetëror, flamujt do të ulen në gjysmështizë në të gjitha institucionet publike, ndërsa strukturat shtetërore do të organizojnë homazhe për të nderuar figurën e tij.
Në vendimin zyrtar përcaktohet se “homazhet publike dhe ceremonia shtetërore do të zhvillohen në mjediset e Teatrit Kombëtar të Operës, Baletit dhe Ansamblit Popullor, në Tiranë, ditën e martë, më 2 shtator 2025, nga ora 10:00 deri në orën 13:00. Në orën 10:00, në nderim të tij, do të ndërpritet çdo veprimtari dhe do të mbahet një minutë heshtje.”
Dhimitër Anagnosti ndërroi jetë në moshën 89-vjeçare, pas një sëmundjeje të rëndë. Ai ishte një nga figurat më të rëndësishme të kinematografisë shqiptare, me një kontribut që shtrihej për më shumë se katër dekada. Gjatë karrierës së tij, Anagnosti u vlerësua me çmime e tituj brenda dhe jashtë vendit, duke lënë pas një trashëgimi të pasur me dhjetëra filma artistikë e dokumentarë që mbajnë firmën e tij.
