Ditën e sotme ish-ministrja e Financave Anila Denaj është paraqitur në SPAK ku ka dëshmuar për rreth 2 orë për koncesionin e sterilizimit.
Pas daljes nga SPAK në një prononcim të shkurtër për gazetarët, Denaj ka deklaruar se është pyetur si një person që ka dijeni në lidhje me këtë koncesion gjatë kohës që ka qenë drejtoreshë e Shërbimeve Mbështetëse në Ministrinë e Financave në vitin 2014.
Ndërkohë që edhe pse gazetarët insistuan duke i drejtuar pyetje të tjera për të mësuar më shumë rreth dëshmisë së Denajt në SPAK, kjo e fundit nuk ka preferuar që të mos japë detaje.
“Jam pyetur për informacion që kam dijeni gjatë kohë që kam qenë drejtoreshë e Shërbimeve Mbështetëse në Ministrinë e Financave në vitin 2014 në kohën që ky koncesion ka qenë në diskutim. Ky nuk është momenti për të dhënë më shumë detaje”, tha Denaj.
Theksojmë se më herët, po për këtë koncesion është marrë në pyetje edhe ish-ministri i Shëndetësisë, zoti Ilir Beqja si dhe zyrtarë të tjerë të Ministrisë së Shëndetësisë për të parë mënyrën dhe kronologjinë e miratimit të këtij koncesioni, i cili është alokuar disa vite më parë nga ministria e Shëndetësisë.
Anila Denaj ka shërbyer si ministre e Financave nga janari 2019 deri në shtator të vitit 2021.
Prej kohësh, prokurorët e SPAK e kanë cilësuar koncesionin e sterilizimit, si një nga çështjet më të nxehta, të cilave u duhet dhënë një zgjidhje.
