Emisioni investigativ italian “Le Iene” ditët e fundit ka pasqyruar historinë e 19-vjeçares shqiptare Antonela Zenelaj, e cila u zhduk nga shtëpia më 3 dhjetor të 2018-s
Familja e saj në shqipëri kërkoi ndihmën e emisionit italian, për ta rikthyer vajzën në banesë.
Sipas familjarëve Antonela është e shurdhër dhe ka probleme me zhvillimin e shëndetit mendor.
Nga ekzaminimet e kryera rezulton se vajza mund të manipulohet lehtësisht, pasi mendon si një 8-vjeçare.
Në vitin 2017, në një takim me të rinj shurdhmemecë në Romë Antonela njohu Xhovanin, një djalë nga Napoli me të cilin u dashurua. Pak muaj më vonë, vajza u largua nga banesa, ndërroi numrin e telefonit dhe fshiu të gjithë të afërmit nga rrjetet sociale.
Motrat e saj dyshojnë se Antonela është manipuluar nga nëna e Xhovanit, Rosa e cila e mban vajzën në një banesë në Napoli, vetëm për të përfituar nga pensioni që ajo merr, që shkon në rreth 900 euro në muaj. Gazetarët e emisionit “Le Iene” në Italia1 arritën të gjenin shtëpinë ku qëndron vajza, por ajo nuk pranoi ta hapte derën.
