Zbardhet dëshmia e 18-vjeçares italiane që ka kallëzuar në Policinë e Durrësit se është abuzuar seksualisht nga 26-vjeçari Leonard Preza, i cili rezulton me precedent penal. Ngjarja ka ndodhur në orët e para të mëngjesit të 5 shtatorit, pranë një hoteli në bregdet.
Sipas dëshmisë së saj, vajza ndodhej me shoqërinë në hotel, por në një moment u shkëput prej grupit dhe u ul në shezlongët përballë. Aty iu afrua 26-vjeçari, i cili, sipas saj, e sulmoi dhe e përdhunoi me forcë pavarësisht rezistencës.
“Gjatë natës kemi qenë me shoqërinë dhe kemi konsumuar edhe pije alkoolike. Për një çast unë jam larguar prej grupit dhe jam ulur në një shezlong që gjendej disa metra larg hotelit. Kjo ka ndodhur rreth orës 05 e 30 minuta afërsisht të mëngjesit të 5 shtatorit. Gjatë kësaj kohe më është afruar një person i cili më ka sulmuar dhe me gjithë tentativat e mia për t’u mbrojtur, më ka përdhunuar pas rezistencës time. Më pas ai është larguar. Unë erdha te juve për të bërë kallëzim lidhur me këtë ngjarje”, ka deklaruar 18-vjeçarja në polici.
Policia arriti ta identifikojë dhe ta arrestojë Leonard Prezën pas kallëzimit të vajzës, dëshmisë së një bashkëpunëtori të policisë që kishte parë të dy në vendngjarje dhe verifikimit të kamerave të sigurisë.
Gjatë marrjes në pyetje, i riu ka pranuar marrëdhënien, por ka pretenduar se ajo ka ndodhur me pëlqimin e të miturës. Nga ana tjetër, 18-vjeçarja u dërgua në spital, ku iu nënshtrua vizitave mjekësore dhe gjinekologjike. Mjekët konstatuan shenja në duar, qafë dhe pjesë të tjera të trupit që tregojnë përdorimin e dhunës. Dëmtimet nuk ishin serioze dhe më pas vajza u la e lirë të largohej.
Hetimet për ngjarjen vijojnë, ndërsa 26-vjeçari do të përballet me akuzën e përdhunimit.
