Një 72-vjeçar me iniciale B.T., nga Saranda është arrestuar ditën e djeshme pasi në kohë të ndryshme ka kryer marrëdhënie seksuale me një 17-vjeçare nga qytetit i Sarandës.
I pranoi të gjitha në Polici: Pranga 72-vjeçarit, abuzoi seksualisht me një të mitur
Ditën e sotme u zbardhën detaje të reja, teksa u raportua se vajza sot është 17 vjeçe, por abuzimi ka ndodhur kur ajo ka qenë vetëm 13 vjeçe.
Sipas dëshmisë së vajzës në moshën 13-vjeçare, vajza me prindërit jetonin me qira në shtëpinë e të moshuarit, i cili ka 20 vite i ve, ndërsa fëmijët e tij jetojnë në Greqi.
Adoleshentja tregon se prindërit e dërgonin që t’i vinte në ndihmë të moshuarit dhe ai abuzonte me të, por e mitura nuk i kishte treguar askujt deri tani, kur historinë ia rrëfeu të dashurit, i cili e bindi ta denonconte në polici.
Mirëpo, së fundmi ngjarja ka marrë një rrjedhë tjetër, pasi në një lidhje telefonike për “Repolitix” e ëma e vajzës së abuzuar ka thënë se asnjë nga këto akuza nuk është e vërtetë dhe se kjo gjë është e stisur nga i dashuri i vajzës, që sipas saj e ka tjetërsuar atë.
Më tej ajo shtoi se këto histori nuk ka ekzistuar kurrë dhe gjithçka nisi kur ajo u njoh me të dashurin, i cili e ka gënjyer atë vazhdimisht dhe e mban me shpresa se do të ndahet me gruan që ka në Itali dhe do martohet me vajzën.
“Vajza shkonte në shkollë tek ekonomiku në Sarandë. Shkonte dhe vinte ishte e qetë. Në muajin mars sa do të mbushte 17 vjeç vjen një djalë dhe më kërkon të takojë burrin. Ata takohen dhe flasin, pinë kafe. Me 72-vjeçarin kemi patur shoqëri, nuk është e vërtetë që ka ndodhur diçka me të. Vajza kishte një djalë dhe unë e pyeta. A je në rregull ? E kupton ti për çfarë flas. Unë nuk kam vajzë për të martuar, i thashë atij djali. Vajzës i thoshte jam 28 vjeç në pasaportë ishte 34. Vajza që kur është njohur me këtë djalin, ajo ka filluar të flasë kështu. Se çfarë i kanë bërë. I kanë hedhur ndonjë ilaç. Vajza ka qenë gjithnjë e shoqëruar nga ne. Ajo nuk i thoshte këto gjëra përpara. Pasi u njoh me atë djalin. Nuk po njoh dot vajzën time. Vajza ime është në rrezik. Nuk më ndihmon njeri. Unë dua vajzën të jetë në rrugë të drejtë. Nuk e di se si ka bërë vajza. Më parë nuk fliste kështu. Më tha do takoj vjehrrën dhe se me djalin ishte në rregull. E mbajti vajzën 28 ditë në shtëpi. Pse e mësonte vajzën të gënjente. Pas ditëlindjes së saj në dt 4 mars e mbajti në shtëpi. Ai e kishte pyetur a je e ndershme. Nga doli ky përdhunim. Ajo i kishte thënë djalit se nuk kam shkuar me njëri. Me 72-vjecarin kemi miqësi, por ai nuk vjen kurrë brenda vetëm kur është burri. Nuk është e vërtetë që ka ndodhur kjo gjë edhe me burrin tim. Ai nuk bën nga këto gjëra. Është njeri punëtor. Unë kërkoj ndihmë se kam frikë mos vajza i bën diçka vetes”, tha e ëma.
Kjo deklaratë është e dyshimtë sepse vetë i moshuari ka pranuar akuzat para policisë dhe nuk dihen arsyet që e kanë shtyrë të ëmën të bënte këtë deklaratë.
Ndoshta mund të jetë nisur nga mentaliteti mbytës i një pjese të shoqërisë sonë, ku shumë gjëra konsiderohen ende tabu, madje edhe abuzimi ndaj grave, duke ngritu kështu një problem madhor që shkon deri tek mosmbështetja e familjes ndaj viktimave.
Në shoqërinë shqiptare kjo temë mbetet shumë delikate, teksa edhe drejtësia duket e papërgatitur përballë pedofilisë.
Sipas medialook.al , të paktën 98 persona të cilët kanë kryer krime seksuale me të miturit kanë rifituar lirinë, por asnjë prej tyre nuk është identifikuar nga drejtësia si pedofilë e s’është trajtuar me mjekime përgjatë apo pas dënimit të kryer në dhjetë vitet e fundit, duke u kthyer sërish në një kërcënim për fëmijët përreth vendbanimeve të tyre në gjithë territorin e Shqipërisë.
