Ditën e sotme, kreu i Policisë së Shtetit Ardi Veliu publikoi një video të nënës së djalit të dhunuar pak ditë më parë nga efektivët e policisë në zonën e Liqenit.
Në video shihej nëna e 15-vjeçarit, emri i së cilës është Zaida Cobo, me një pistoletë në dorë.
Ardi Veliu e argumentoi këtë se i riu vinte nga një familje problematike.
Veliu, këtë video e shiti si një ngjarje të vërtetë dhe tha se kjo ishte edukata që i ka dhënë Ziada Çobo djalit të saj dhe kështu ai justifikoi dhunën e Policisë.
Në një intervistë për “Abc News”, Çobo e ka përgënjeshtruar Veliun dhe paralajmëroi se do bëjë padi në prokurori ndaj tij për “prishje imazhi”.
Sipas saj, Veliu publikoi videon e marrë nga profili i saj në Facebook ku ajo shfaqet me pistoletë.
Çobo u shpreh se video është xhiruar gjatë filmit “Dashuria nuk mjafton”.
“Unë e përgënjeshtroj 100% sepse është i vjedhur nga Facebook-u im dhe është shkëputur nga filmi “Dashuria nuk mjafton”.
Krerët tanë nuk marrin vesh nga kultura. Duke folur për djalin tim thoshte ajo, ajo, ajo, mamaja e saj. Djali im është dy metra djalë.
E kam rritur djalin vetë. Si do reagonte ai po të ishte djali i tij.
Nëse unë jam me precedentë penalë pse më kanë pranuar në Policinë e Shtetit. Kam bërë testimin dhe për dy pikë nuk e mora.
Filmi është “Dashuria nuk mjafton” e regjisorit të madh Drilon Hoxha që ka bërë bujë. Nga një ana të vjen keq por edhe për të qeshur për reagimin e tyre.
Unë jam duke e ndjekur këtë çështje me struktura më lart se policia. Unë e kam thënë se në intervistat e mia që ndihem e kërcënuar.
Këto momente nuk ndihem derisa të dalë e drejta. Le t’i marrin videot nuk kam turp nga ato që kam bërë në jetë. Kam qenë në “Big Brother”, dhe në shfaqje të tjera por këta nuk dinë nga kultura.
Nuk më ka ardhur asnjë gjobë për djalin. Janë përgënjeshtrime këto që po thonë. Djali vazhdon me trajnime me psikologun. Veliu të shkojë të pyesë se ku luan fëmija im.
Nuk do rri pa e denoncuar këtë prishje imazhi, do shkoj në prokurori”, tha Çobo.
