15 Maji shënon Ditën Ndërkombëtare të Familjes, një datë e përcaktuar nga Asambleja e Përgjithshme e Kombeve të Bashkuara për të theksuar rëndësinë e familjes dhe për të rritur ndërgjegjësimin mbi sfidat që ajo përballet në shoqëritë moderne.
Kjo ditë synon të nxjerrë në pah rolin që familja luan si njësi themelore e shoqërisë dhe të nxisë hartimin e politikave që e mbështesin dhe e forcojnë atë.
Aktivitete të shumta zhvillohen në mbarë botën, nga niveli lokal deri në atë ndërkombëtar, për të adresuar çështje sociale, ekonomike dhe demografike që ndikojnë drejtpërdrejt jetën familjare.
Temat që trajtohen çdo vit variojnë, nga barazia gjinore brenda familjes, te ndikimi i migrimit, varfërisë, apo edhe ndryshimet në modelet e strukturës familjare.
Kombet e Bashkuara nisën të përqendrohen në çështjet e familjes që në vitet 1980, dhe në 1989 shpallën atë vit si Vitin Ndërkombëtar të Familjes, duke çuar më pas në zyrtarizimin e 15 Majit si ditë ndërkombëtare në vitin 1993.
Në këtë kontekst, Organizata Ndërkombëtare “World Vision” i ka kushtuar një fushatë të veçantë mbrojtjes së fëmijëve brenda familjes.
Duke theksuar se “një pjesë e madhe e dhunës që përjetojnë fëmijët në Shqipëri ndodh aty ku ata duhet të ndihen më të sigurt në familje”, kjo organizatë përçon mesazhin e fortë: “Mbrojtja fillon në familje.”
Kjo ditë është një mundësi për të reflektuar mbi vlerat e bashkëjetesës, dashurisë dhe solidaritetit që përfaqëson familja.
Është një kujtesë se nuk ekziston një model unik për atë çfarë quhet “familje” dhe se diversiteti familjar është një pasuri që duhet mbrojtur e promovuar.
