Muaji shkurt vijon të shënojë shifra alarmante në aksidentet rrugore në vend. Statistikat e fundit të Policisë së Shtetit tregojnë se që nga fillimi i muajit janë regjistruar 64 aksidente automobilistike, ku kanë humbur jetën 13 persona dhe mbi 70 të tjerë janë plagosur.
Java e dytë e shkurtit nisi me një bilanc tragjik prej 5 viktimash. Eksperti rrugor Arben Luzi thekson se përdorimi i telefonit celular gjatë drejtimit të mjetit mbetet një nga shkaqet kryesore të aksidenteve fatale.
“Vëzhgimet tregojnë se shumica e drejtuesve të mjeteve përdorin telefonin gjatë ngarjes. Në rrugët interurbane që lidhin qytetet e Shqipërisë, përdorimi i celularit në shpejtësi të lartë është tejet i rrezikshëm. Nevojiten më shumë pika kontrolli, derisa kjo të bëhet normë, ashtu siç ndodhi me përdorimin e rripit të sigurimit,” shprehet Luzi.
Lezha, Elbasani dhe Fieri kryesojnë listën e qarqeve me numrin më të lartë të aksidenteve për muajin shkurt. Shumica e aksidenteve shkaktohen nga drejtuesit e mjeteve, veçanërisht të grupmoshës 24-35 vjeç.
“Kjo grupmoshë shfaq më shumë vetëbesim të tepruar. Mendojnë se janë shoferë të aftë dhe kryejnë veprime të rrezikshme si drejtimi me një dorë, parakalime të gabuara dhe shpejtësi të lartë,” sqaron eksperti.
Problematike mbetet edhe sjellja e këmbësorëve. Në Tiranë, pranë Piramidës, qytetarët vijojnë të kalojnë rrugën në mënyrë të parregullt, duke injoruar vijat e bardha që ndodhen vetëm pak metra larg.
“Aksidentet në zonat urbane, veçanërisht në kryqëzime, shpesh ndodhin për shkak të mosrespektimit të rregullave nga këmbësorët. Është çështje edukate qytetare,” përfundon Luzi.
