Pelegrinazhi i këtij viti në vendet e shenjta të Arabisë Saudite është shënuar nga një tjetër tragjedi.
Të paktën 13 pelegrinë iranianë kanë humbur jetën gjatë Haxhit, ndërsa temperaturat ekstreme kanë përfshirë rajonin, raportoi të hënën agjencia shtetërore iraniane e lajmeve IRNA.
Sipas deklaratës zyrtare nga njësia e operacioneve shëndetësore dhe mjekësore të Gjysmëhënës së Kuqe Iraniane, viktimat janë regjistruar që prej datës 6 qershor.
Nuk janë bërë të ditura shkaqet specifike të vdekjeve, por autoritetet shëndetësore theksuan se temperaturat në Mekë dhe Medinë kanë arritur deri në 47°C, duke shtuar rrezikun për goditje nga nxehtësia, veçanërisht te personat e moshuar apo me gjendje të brishtë shëndetësore.
Sipas të dhënave të IRNA-s, qendrat mjekësore të Gjysmëhënës së Kuqe në dy qytetet e shenjta kanë ofruar mbi 138 mijë shërbime mjekësore për pelegrinët iranianë gjatë ditëve të pelegrinazhit. Këtë vit, rreth 86,700 qytetarë nga Irani morën pjesë në Haxh.
Kjo ngjarje tragjike vjen një vit pas një tjetër bilanci të rëndë, gjatë Haxhit të vitit 2024, mbi 1,300 pelegrinë humbën jetën, përfshirë 22 nga Irani, teksa temperaturat shënuan një rekord ekstrem prej 52°C.
Ekspertët paralajmërojnë se ndryshimet klimatike po intensifikojnë frekuencën dhe fuqinë e valëve të të nxehtit, duke e bërë gjithnjë e më të rrezikshëm zhvillimin e aktiviteteve masive si Haxhi.
Viti 2024 u shpall zyrtarisht si më i nxehti i regjistruar ndonjëherë, sipas Shërbimit të Ndryshimeve Klimatike Kopernikus të Bashkimit Evropian.
Kushtet ekstreme të motit po shtrojnë sfida të reja për organizimin e pelegrinazhit më të madh në botë, duke rritur shqetësimet për sigurinë e miliona besimtarëve që udhëtojnë drejt Mekës çdo vit.
