Një ngjarje e veçantë ka sjellë emocion dhe gëzim në maternitetin “Mbretëresha Geraldinë”, ku 10 mami që çdo ditë kujdesen për jetën e nënave dhe foshnjave, janë vetë në pritje të ëmbël.
Lajmi u bë i ditur përmes një postimi në rrjetet sociale nga faqja zyrtare e maternitetit, ku u vlerësua përkushtimi i tyre i përditshëm dhe u theksua bukuria e këtij momenti unik.
“Nga duart që kujdesen për jetën, tek zemrat që mbajnë jetë brenda tyre. Në maternitetin ‘Mbretëresha Geraldinë’, 10 mami po përjetojnë së bashku mrekullinë e shtatzënisë. Ato që çdo ditë kujdesen me përkushtim maksimal për gruan, nënën dhe foshnjën, sot mbajnë edhe vetë bekimin më të madh, jetën brenda tyre. Një dhuratë e rrallë që na emocionon të gjithëve!”, thuhet në njoftim.
Ky moment i pazakontë është cilësuar si një dhuratë e rrallë, duke sjellë frymë pozitive jo vetëm te stafi, por edhe tek të gjitha nënat dhe pacientet që ndihen të mbështetura nga mami që tashmë ndajnë të njëjtin emocion me to.
