Përfaqësuesit e ambasadës ruse në Tiranë kanë mbërritur tek Instituti i Mjekësisë Ligjore, për të kërkuar informacion më të detajuar në lidhje me ngjarjen tragjike në Qerret të Kavajës ku mbetën të vdekur katër turistë rusë.
Ditën e sotme drejtësia shqiptare e ka klasifikuar vdekjen e tyre si vrasje. Dyshimet më të forta janë se shkak për vdekjen e tyre është bërë asfiksia edhe pse nuk dihet akoma se nga ka ardhur.
Sipas ekspertëve të mjekësisë Ligjore janë shprehur se kanë pasur viktima nga klori edhe më herët, por jo katër raste njëherësh. Për këtë arsye, Prokuroria e ka regjistruar ngjarjen si vrasje e mundshme, por pa pasur një autor.
Gjithashtu është bërë me dije se dosja e ngjarjes po shihet me shumë kujdes nga ekspertët, për shkak të kohës së shkurtër në të cilën kanë gjetur vdekjen të katër turistët, çifti Natalia Burenkova, 58 vjeçe, Sergei Burenkov, 60 vjeç, dhëndri i tyre, Nikita Belousov, 37 vjeç, dhe vajza e tyre, Ekaterina Burenkova, 31 vjeçe.
Po ashtu rikujtojmë se janë disa pista që po hetohen në lidhje me tragjedinë e katërfishtë, por më e fortë qëndron ajo e përdorimi i tepruar i klorit në pishinën ku u gjetën viktimat, por edhe mosventilimi i mjaftueshëm i ambientit, ndërsa nuk përjashtohet edhe helmimi.
Sjellim në vëmendje se ngjarja e rëndë ndodhi ditën e premte pak para mesnate dhe viktimat janë gjetur nga recepsionisti i hotelit.
