Dalin në dritë detaje të reja nga vdekja misterioze e katër turistëve rusë në Qerret të Kavajës. Mësohet se drejtësia shqiptare e ka regjistruar çështjen si vepër penale të vrasjes vdekjen e turistëve.
Po ashtu ditën e sotme, pritet që Mjekësia Ligjore të nxjerrë ekspertizën, e cila mund të hedhin më shumë dritë mbi vdekjen e turistëve.
Sjellim në vëmendje se ngjarja tragjike ndodhi pak para mesnatës të së premtes, ku katër turistë u gjetën të pajetë në pishinën dimërore, në Qerret, ndërsa e gjithë ngjarja vijon të mbetet një mister.
Fillimisht u tha se turistët ishin asfiksuar në sauna, apo kishin konsumuar shumë kokainë, por nga hetimet të dyja këto teori u hodhën poshtë, ndërsa si pistë kryesore mbeti ajo e asfiksisë nga klori në pishinë.
Kujtojmë se viktima mbetën çifti Natalia Burenkova, 58 vjeçe, Sergei Burenkov, 60 vjeç, dhëndri i tyre, Nikita Belousov, 37 vjeç, dhe vajza e tyre, Ekaterina Burenkova, 31 vjeçe. Ditën e djeshme me anë të një njoftimi zyrtar, ambasada e Rusisë në Tiranë ka bërë me dije se po vijojnë hetimet për të zbuluar shkaqet e ngjarjes së rëndë. Gjithashtu kanë bërë me dije se janë në kontakt të vazhdueshëm me organet ligjzbatuese. Ndër të tjera Ambasada Ruse ka theksuar se pritet një hetim i plotë nga ana e Shqipërisë për të zbardhur shkaqet e vdekjes. Gjithashtu kanë bërë me dije se do të riatdhesohen trupat e viktimave.
