Ditën e sotme ka nisur zyrtarisht viti i ri akademik 2021-2022, pas një viti të zhvillimit të mësimit online, studentët rikthehen në auditore.
Në Universitet e Tiranës kanë nisur edhe tensionet e para. Në Fakultetin e Filologjisë studentët janë përplasur me policinë në hyrje të universitetit, pasi nuk janë lejuar të hyjnë në auditore pa vaksinën anti-COVID ose test PCR.
Studentët janë revoltuar dhe si duket edhe nga pamjet, ata përplasen me policët, duke iu kërkuar që t’i lejojnë të hyjnë brenda. Në video dëgjohen studentët, që thonë “Çfarë vaksinimi, hape rrugën për studentët”.
Kujtojmë se fillimi i vitit të ri akademik u shty me një javë, pasi ekspertët e panë si të arsyeshme që të gjithë studentët dhe pedagogët të merrnin dozat e vaksinës në mënyrë që të kryenin një proces mësimor sa më të sigurt.
Të gjithë studentët mund ta merrnin dozën e tyre të vaksinës në universitetet përkatëse vetëm me kartën e identitetit ndërsa Ministria e Shëndetësisë e cilësoi javën të hapur të vaksinimit.
Disa ditë më parë rektori i Universitetit të Tiranës, Artan Hoxha u shpreh se në Tiranë janë vaksinuar rreth 50% e studentëve dhe gjithashtu bëri me dije se në auditore do të pranoheshin edhe ata studentë që kanë marrë një dozë të vaksinës.
