Mëngjesin e sotëm kanë “zbarkuar” në zyrat e Hipotekës së qytetit të Vlorës Prokurorët e SPAK-ut. Mësohet se Prokurorët po kërkojnë disa dosje që kanë lidhje me zonat bregdetare dhe mësohet se kanë sekuestruar disa dosje dhe dokumente në llogari të hetimeve që janë ende në proces.
Kujtojmë se drejtues politik i Partisë Socialiste në qarkun e Vlorës është caktuar Arben Ahmetaj. Në qarkun e Vlorës, Ahmetaj zëvendëson Gjiknurin. Ndërsa nga informacionet e fundit bëhet me dije se kreu i Kadastrës së Vlorës, Klodian Troci ka dhënë dorëheqjen. Kujtojmë se Troci kishte vetëm pak muaj që ishte emëruar në krye të institucionit.
Në vendin e tij në krye të Kadastrës është emëruar, Reinard Meta, i cili më herët ka punuar në Kadastrën e Tiranës. Sot është dita e parë e drejtorit të ri dhe në Kadastrën e Vlorës kanë zbarkuar SPAK, i cili si u tha edhe më sipër pritet të kërkojë informacion mbi disa prona në jug të vendit.
Sjellim në vëmendje se brenda një viti janë ndryshuar 10 drejtor në Kadastrën e Vlorës, ndërkohë që pronat në jug duket se janë dhe ”patatja” e nxehtë që kërkon të marrë një zgjidhje afatgjatë. Dorëheqjet dyshohet se lidhen me çështje pronësie në bregdetin e Jugut.
