Një ditë pasi 7-vjeçarja Jonada Avdia, e cila u vra nga skafi që drejtonte Arjan Tase në Himarë, u përcoll për në banesën e fundit, në Tiranë është thirrur një protestë nga shoqëria civile dhe jo vetëm, nën moton “nuk e vrau varka por shteti”.
Protesta homazh pritet që të mbahet sot në orën 19:00, përpara Ministrisë së Brendshme ku do të kërkohet dorëheqja e Bledi Çuçit, dhe ministres së Turizmit Mirela Kumbaro, e cila vetëm pak ditë më parë mburrej në rrjetet sociale se ishte fituar beteja me mjetet e ujit.
Vetë Çuçi, edhe pse mban një prej posteve më të rëndësishëm në qeveri, atë të ministrit të brendshëm, nuk ka bërë asnjë reagim për tragjedinë e ndodhur, pavarësisht se përgjegjësia bie dyfish ndaj sektorit që ai drejton, pasi Arjan Tase ishte shef i policimit në komunitet në komisariatin e Elbasanit.
Protestën e kanë përkrahur dhe dy partitë kryesore të opozitës, PD dhe Partia e Lirisë, por deri tani drejtuesit e tyre nuk e kanë konfirmuar pjesëmarrjen, edhe për të shmangur akuzat nga qeveria se po ‘bëjnë politikë me vdekjen’.
Jonada kishte ardhur me pushime në vendlindjen e prindërve të saj, të cilët prej më shumë se dy dekadash jetonin në Angli, ndërsa në Laprakë kishin edhe shtëpinë, në të cilën qëndronin gjyshërit e vogëlushes.
Me qindra qytetarë iu bashkuan dy ditët e fundit dhimbjes së familjes Avdia, ndërkohë rrjetet sociale kanë përcjellë pa ndarë zemërimin dhe revoltën e madhe për atë tragjedi që i mori jetën vajzës.
Njerëz afër familjes kanë treguar se ngjarja i është lënë drejtësisë, ndërkohë që ditën e sotme, përveç daljes para gjykatës të komisarit që e shkaktoi ngjarjen, pritet edhe protesta orëve të mbrëmjes në Tiranë. Nga qeveria nuk pati asnjë reflektim, përvç disa shkarkimeve në radhët e policisë kufitare të Vlorës.
