Këtë të hënë qytetarë do të protestojnë përsëri përballë kryeministrisë kundër rritjes së çmimeve. Protesta e cila organizohet nga shoqëria civile do të mbahet më orën 18:00 pranë Bulevardit Dëshmorët e Kombit, për të kërkuar uljen e çmimeve të ushqimeve të shportës, çmimet e karburanteve, biletave të transportit publik dhe energjisë elektrike, të cilat ndikojnë në jetën e qytetarëve shqiptarë.
Organizatorët e protestës, nëpërmjet një video-mesazhi në rrjetet sociale kanë bërë një përmbledhje të aktivitetit të protestës të zhvilluar ditët më përpara.
Ndër të tjera theksohet se kërkesat e tyre janë artikuluar qartazi për qeverinë dhe janë shumë të kuptueshme edhe për publikun.
Çfarë kërkojnë qytetarët:
–Heqjen e TVSH për ushqimet e shportës.
-Uljen e TVSH-së në masën 10% të çmimit të energjisë për bizneset e vogla dhe familjet.
-Heqjen e taksës së qarkullimit në naftë
-Heqjen e akcizës së gazit
Por çfarë ka ndodhur në vend që ka nxitur reagim popullor?
E gjitha nisi me rritjen e çmimit të bukës me 10 lekë. Paralajmërimet e më vonshme për rritjen e çmimit të kafes, energjisë elektrike dhe të karburanteve bënë që të qytetarët ‘të zgjidheshin’. Kreu i Qeverisë Edi Rama deklaroi se qytetarët duhet të përgatiten krizën energjitike; rritjen e çmimit të gazit me rreth 250%, atë të karbonit me rreth 80% dhe të naftës. Rama tha se kjo krizë do prekë jetën e familjeve dhe bizneseve, por qeveria do u qëndrojë pranë shtresave në nevojë, biznesit të vogël dhe konsumatorëve familjarë.
