Ditën e sotme një ngjarje e paprecedentë ka ndodhur në Kosovë, ku forcat e policisë kosovare janë sulmuar me armë zjarri. Ngjarja ka ndodhur teksa Policia e Kosovës ka qenë duke vendosur një barkë patrulluese në Liqenin e Ujmanit. Sipas të dhënave të autoriteteve kosovare kanë qenë rreth 10 të shtëna me armë zjarri dhe aktualisht nuk raportohet për të lënduar. Nuk dihen ende motivet e kësaj ngjarje të rëndë, por policia po heton për zbardhjen e saj.
Komunikata e plotë:
Sot, më 06.08.2022 rreth orës 11:25, njësia policore e Stacionit Policor për Mbikëqyrjen e Kufirit (SPMK) Zubin Potok, derisa ka qenë duke vendosur një barkë patrulluese në Liqenin e Ujmanit është sulmuar me armë zjarri.
Njësia policore ka njoftuar se në drejtim të tyre ka pasur të shtëna me armë. Kanë qenë afërsisht 10 të shtëna me armë zjarri. Të shtënat kanë qenë të njëpasnjëshme, nga pjesa tjetër e liqenit dhe kanë goditur afër barkës së policisë. Nga këto të shtëna nuk ka persona të lënduar.
Në asistencë të njësisë policore ka shkuar Njësia e Ndërhyrjes së Shpejtë e Policisë Kufitare. Policia po vazhdon të vëzhgojë terrenin dhe ta trajtojë rastin.
Policia e Kosovës mbetet e përkushtuar në ofrimin e sigurisë dhe luftimin e kriminalitetit e me theks të veçantë të kontrabandës në atë zonë.
