Ministrja e Shëndetësisë, Ogerta Manastirliu ka qenë në selinë qendrore të UNICEF në Kopenhagen, nga ku ka bërë me dije se janë siguruar 200 mijë doza vaksine kundër gripit dhe 144 mijë doza të vaksinës anti-Covid nëpërmjet programit COVAX që pritet të vijnë së shpejti në Shqipëri.
“Kopenhagen – Në selinë qëndrore të UNICEF, për forcimin e bashkëpunimit për sigurimin e pandërprerë të kalendarit të plotë të vaksinave për vendin tonë.
Shqipëria ka financuar dhe siguruar 200 mijë doza vaksine kundër gripit, teksa po vijon furnizimi me vaksina anticovid, edhe përmes instrumentit COVAX, nga ku pritet të vijnë së shpejti 144 mijë doza vaksinash në Shqipëri”, shkruan Manastriliu në një postim në Facebook.
Ministrja ka thënë pavarësisht pandemisë, edhe këtë vit do të jetë e garantuar për grupet e riskut edhe vaksina e gripit.
“Ashtu sikurse në këto vitet e fundit, edhe këtë vit, pavarësisht gjithë vëmendjes që kemi për të rritur disponibilitetin e vaksinave anticovid, do të kemi gjithashtu të garantuar për grupet e riskut, edhe vaksinën kundër gripit. Përsa i përket vaksinës së gripit janë më shumë se 200 mijë vaksina të cilat pritet që të vijnë brenda tetorit dhe muajit nëntor. Ky do të jetë kalendari i lëvrimit të vaksinave sipas UNICEF”, tha Manastirliu.
