Ministrja e Shëndetësisë, Ogerta Manastirliu me anë të një postimi në rrjetet sociale, iu ka bërë thirrje sërish studentëve që të vaksinohen. Teksa kanë ngelur vetëm pak ditë nga nisja e vitit të ri akademik, Manastirliu duke iu bërë apel studentëve iu kujton edhe që mjekët dhe vaksinatorët janë në terren në të gjitha universitete publike dhe jopublike.
Ndër të tjera Manastirliu ka theksuar se java e hapur e vaksinimit në universitete është mundësia për çdo student për të mbrojtur shëndetin e tij, por edhe përgjegjësi qytetare për mbrojtjen e shëndetit të gjithësecilit.
“Mjekët dhe vaksinatorët tanë janë në terren, në universitetet publike dhe jo publike, në dispozicion të studentëve pranë fakulteteve ku ata studiojnë, për t’u vaksinuar çdo ditë të kësaj jave, para nisjes së vitit të ri akadamik.
Java e hapur e vaksinimit në universitete është mundësia për çdo student për të mbrojtur shëndetin e tij, por është edhe përgjegjësi qytetare për mbrojtjen e shëndetit të gjithësecilit, për të hyrë të sigurt në auditore.
#VAKSINOHU
#JetaJoteVLEN “, mesazhi i ministres së Shëndetësisë, Ogerta Manastirliu.
Kujtojmë se muaji tetor është muaji i hapur për vaksinimin dhe të gjithë studentët mund të marrin dozat e tyre të vaksinës në çdo Universitet. Kujtojmë se nisja e vitit të ri akademik është shtyrë për në datën 18 tetor, në mënyrë që studentët të vaksinohen.
