Ditën e sotme është vënë në pranga një biznesmen sapo ka hyrë në territorin shqiptar, pasi ishte i shpallur në kërkim nga 1 qershori. Biznesmeni Behar Muçobega u arrestua në Qafë-Botë. 40-vjecari u kthye nga Greqia sot në orët e para të mëngjesit, ishte person në kërkim pasi ishte i përfshirë në skandalin e ASHK dhe Bashkisë, lidhur me tjetërsimin e 9920 m2 truall në bregdet. Prokuroria e Sarandës kishte lëshuar 9 urdhër arreste në lidhje me këtë çështje. Ku përfshiheshin zyrtarë, biznesmenë dhe qytetarë. Behar Muçobega akuzohet për “falsifikim dokumentash”, dyshohet si një nga përfituesit e një pjese të truallit.
Vetëm brenda pak orësh nga ndalimi, Muçobega ka dalë para Gjykatës së Sarandës, ku ndaj tij gjyqtari Shkelzen Liçaj ka vendosur masën e sigurisë “Arrest në shtëpi”. Nga operacioni i 1 qershorit u arrestuan 6 persona dhe u shpallën në kërkim 3. Gjykata liroi 5 nga të arrestuarit duke vendosur masën e sigurisë “Arrest në shtëpi” ndërsa në burg ka ngelur vetëm noteri Aleko Anagnosti. Në kërkim vazhdon të jetë ish-Drejtori i ASHK Sarandë Ardian Kola si dhe biznesmeni Bedri Muçobega, vëllai i të ndaluarit të sotëm.
Nga 4 operacione të Prokurorisë së Sarandës dhe SPAK në 6 muajt e fundit janë lëshuar 20 urdhër arreste për zyrtarë, biznesmenë e qytetarë. Nga të gjitha këto urdhra vetëm 4 ndodhen aktualisht në “Arrest në burg”, 10 janë në “Arrest në shtëpi” dhe 6 janë persona në kërkim. Nga këto operacione është sekuestruar në total 10.599 m2 truall dhe një pallat 7 katësh. Veç këtyre prokuroria mbajti disa kohë nën sekuestro edhe një zyre noteriale ku grumbulloi dokumentacion lidhur me hetimet.
Pas operacioneve të prokurorisë, dy nga zyrtarët që aktualisht ndodhen në burg, u sulmuan edhe nga elemente kriminale. Zyrës noteriale të Aleko Anagnostit iu vu zjarr 5 ditë pas arrestimit të tij, ndërkohë që automjeti i ish-juristit të ASHK Sarandë Laert Pasha u sulmua pak ditë më parë duke iu thyer xhami, çarë gomat e lyer me sprajt.
