Gjykata e Posaçme ka vendosur rihapjen e çështjes “Gërdeci” dhe kërkon rigjykim për ish-ministrin e Mbrojtjes, Fatmir Mediu. SPAK iu drejtua më herët gjatë këtij viti Gjykatës së Lartë me një kërkesë ku kërkonte revokimin e vendimit të marrë më 2009 i cili pushoi çështjen për ish-ministrin e Mbrojtjes Fatmir Mediu. Kujtojmë se në atë kohë çështja ndaj Mediut u pushua me arsyetimin se nuk mund të gjykohej pasi ishte me imunitet. Sot Gjykata e Posaçme e Apelit për Korrupsionin dhe Krimin e Organizuar vendosi të revokojë pushimin e vendimit të Gjykatës së Lartë.
Rinisja e hetimit për ish-ministrin e Mbrojtjes do të bëhet për akuzën “shpërdorim detyre”, në lidhje me tragjedinë e Gërdecit ku nga shpërthimi i punishtes së demontimit të armëve mbetën 26 të vrarë dhe qindra të plagosur.
“Me referimin në parashikimin e pikës 1, shkronja b), të nenit 46, të ligjit 98/2016 “Për Organizimin e Pushtetit Gjyqësor në Republikën e Shqipërisë” si dhe, në interesin e treguar nga media, komunikohet në mënyrë të përmbledhur se, sot më datë 24.09.2021, në Gjykatën e Posaçme të Apelit për Korrupsionin dhe Krimin e Organizuar, mbi ankimin e Prokurorit të Posaçëm dhe të trashëgimtarëve të viktimës E.D., u zhvillua seanca gjyqësore në dhomë këshillimi, për çështjen penale nr. 212 akti, datë 03.09.2021 regjistrimi, ku Gjykata vendosi, të ndryshojë vendimin nr. 60, datë 27.07.2021 të Gjykatës së Posaçme të Shkallës së Parë për Korrupsionin dhe Krimin e Organizuar, duke pranuar kërkesën e Prokurorit të Posaçëm dhe revokoi vendimin e pushimit nr. 6, datë 14.09.2009 të Kolegjit Penal të Gjykatës së Lartë, duke
i kthyer aktet Prokurorit të Posaçëm për të proceduar”.
