Zgjedhjet për kreun e Partisë Demokratike pritet që të mbahen më 22 maj, ndërkohë që zyrtarisht tashmë kemi 2 emrat e kandidatëve. Sali Berisha dhe Ibsen Elezi janë dy kandidatët për kreun e ri të PD-së.
Komisioni i Organizimit dhe Kontrollit të Operacioneve Elektorale, në një njoftim shprehet së në përfundim të afatit të paraqitjes së kandidaturave për kryetar të PD, Berisha dhe Elezi kanë shprehur interesin, duke dorëzuar kështu edhe dokumentet e nevojshme.
Ndërkohë që bëhet e ditur se mbledhja e ardhshme e Komisionit do të mbahet ditën e nesërmë në orën 11:00.
Vlen të përmendim se i pritshëm ishte kandidimi i vetëm i Berishës, por kjo gjë nuk ndodhi. Më herët dy pretendentë kryesorë Fatbardh Kadilli deh Ervin Kulluri që u përfolën se do të dilnin përballë Berishës, u tërhoqën nga gara në mënyrë të papritur.
“Gara ime nuk bëhet për rivalë por për anëtarët e PD-së. Unë do të paraqitem për të fituar votat dhe besimin e anëtarëve. Se çfarë vendimi do marrin të tjerët ajo nuk ka lidhje me mua. Ajo është vendim personal i gjithësecilit. Cilido që të kandidojë, e garantoj se ai komison do të krijojë të gjitha kushtet dhe mundësinë për një garë transparente. Nuk sajoj dhe nuk shpik rivalë”, është shprehur më herët ish-kreu i qeverisë.
Njoftimi:
Njoftim i Komisionit të Organizimit dhe Kontrollit të Operacioneve Elektorale.
Komisioni i Organizimit dhe Kontrollit të Operacioneve Elektorale njofton se:
Në përfundim të afatit të paraqitjes së kandidaturave për kryetar të PDSH, kanë shprehur interesim për këtë garë, konform Vendimit Nr. 12 dt 03.05.2022:
- Sali Berisha
- Ibsen Elezi
Mbledhja e ardhshme e Komisionit do të mbahet ditën e martë ora 11.00.
