Zvicra do të zhvillojë më 8 mars një referendum të rëndësishëm për të ardhmen e parasë fizike. Qytetarët do të vendosin nëse do të miratojnë një ndryshim kushtetues që garanton me ligj disponueshmërinë e parasë cash në vend, në një kohë kur pagesat elektronike po fitojnë terren.
Nisma mban titullin “Po për një monedhë zvicerane të pavarur dhe të lirë me monedha ose kartëmonedha” dhe është promovuar nga Movimento svizzero per la libertà, një lëvizje që u bë e njohur gjatë pandemisë së COVID 19 për qëndrimet e saj kundër vaksinimit.
Qëllimi i propozimit është të ndalojë zhdukjen graduale të parasë fizike dhe ta mbrojë atë përmes Kushtetutës. Aktualisht, përveç kartave bankare, në vend përdoret gjerësisht edhe aplikacioni Twint, i cili mundëson pagesa me kod QR direkt nga telefoni celular.
Sipas një sondazhi të publikuar nga Banka Kombëtare Zvicerane, 95 për qind e popullsisë vazhdon të përdorë para cash. Në qarkullim ndodhen mesatarisht rreth 73 miliardë franga zvicerane. Megjithatë, 70 për qind e pagesave realizohen përmes mjeteve elektronike. Nga ana tjetër, më shumë se gjysma e qytetarëve shprehen se do të donin të hiqeshin nga përdorimi monedhat 5 centëshe, të cilat konsiderohen të bezdisshme.
Në qytetin e Lugano, autoritetet lejojnë edhe pagesën e taksave me kriptovaluta, duke reflektuar hapjen ndaj teknologjive të reja financiare.
Mbështetësit e nismës argumentojnë se paraja fizike mbetet thelbësore, sidomos në rast të sulmeve kibernetike ndaj bankave apo në rast reduktimi të bankomateve dhe sporteleve bankare për arsye kursimi. Sipas tyre, frangu zviceran konsiderohet një aset i sigurt, krahas arit dhe pasurive të paluajtshme.
Lëvizja kërkon gjithashtu që çdo kalim i mundshëm në një monedhë tjetër, edhe pse aktualisht i largët, të miratohet vetëm përmes një referendumi popullor.
