Zvicra ka ndjekur shembullin e një pjese të vendeve europiane që kërkojnë një certifikatë të vaksinimit ndaj Covid-19 për të kryer disa aktivitete. Nga e hëna, qytetarët duhet të tregojnë një certifikatë të statusit të Covid-19 për të hyrë në bare, restorante dhe qendra fitnesi, në një masë kjo për të lehtësuar presionin ndaj spitaleve që po luftojnë për të përballuar valën e katërt të infeksioneve.
Qeveria javën e kaluar u gjend të mes të zjarrit të një debati publik nëse po shkonte shumë larg për të shkelur lirinë e individëve. Por me situatën në spitalet e mbingarkuara dhe disa shtyrje të operacioneve, kabineti vazhdoi të mërkurën me planin.
“Situata mbetet e paqëndrueshme me më shumë se 3.500 raste sot. Alternativa është të mbyllim gjithçka, dhe ne do të bëjmë çmos për ta shmangur atë”, tha Ministri i Shëndetësisë Alain Berset në një konferencë shtypi në Bern.
Certifikata zvicerane COVID siguron dëshmi të vaksinimit, shërimit nga infeksioni ose një rezultat negativ të testit. Përdorimi i zgjeruar i saj është zhvendosur në fokus pasi numri i infeksioneve të reja në Zvicër dhe në shtetin e vogël fqinj, Lihtenshtajni tregojnë shkallën më të lartë të incidencës në Evropën kontinentale.
Më shumë se 800,000 janë infektuar me virusin që nga fillimi i pandemisë. Numri i të vdekurve ka kaluar 10,500. Pak më shumë se gjysma e popullsisë zvicerane është vaksinuar plotësisht, duke mbetur prapa në vendet e tjera evropiane.
Qeveria gjithashtu po shqyrton kufizimet e reja të udhëtimit për njerëzit që nuk ishin vaksinuar ose shëruar nga virusi. Ato mund të përfshijnë karantina ose testime të COVID-19. Ndër të tjera, mund të kërkohet që individët të japin një rezultat negativ të testit për të hyrë në vend, pavarësisht nga ku dhe si mbërrijnë.
