Ditën e sotme partia Socialiste Evropiane konfirmon se nuk dëshiron të ketë mes të ftuarve të tyre në Kongresin që do të mbahet në Berlin me 14 dh e 15 tetor, Ilir Metën në cilësinë e liderit të Partisë së Lirisë.
Giacomo Filibek, zëvendëspresident i PES, përmes një lidhjeje telefonike nga Praga konfirmon thotë për Report TV se Meta nuk është më i ftuar i dëshiruar në kongres. Sipas tij, shkak për anulimin e ftesës është fakti që ai kishte bërë aleancë me kryedemokratin Sali Berisha.
“Nuk e kam idenë nëse adresat mail ishin të gabuara apo të sakta por ju konfirmoj se Ilir Meta nuk është më i ftuar i dëshiruar në kongresin tonë si shkak i vendimit të tij për t’u bërë aleat me Sali Berishën. Nuk ka asnjë rëndësi nëse vetë Meta donte apo jo të merrte pjesë. Në të shkuarën ai është ftuar gjithnjë si i mirëpritur, herën e fundit në Kongresin e Lisbonës në dhjetor 2018 dhe ai ka pasur gjithnjë interes të mbajë marrëdhënie të mira me ne. Tani gjërat kanë ndryshuar dhe ai nuk është më i ftuar të marrë pjesë për shkak të pozicionit të tij të ri politik,”- tha ai.
Ditën e sotme, qarkulloi në media një e-mail që shkruante se ish-presidenti Ilir Meta është përjashtuar nga Kongresi i Partive Europiane Socialiste që pritet të mbahet në 14-15 tetor. Ky lajm u shpërnda edhe nga zëvendës kryetarja e Kuvendit të Shqipërisë, Ermonela Felaj. Partia e Lirisë e hodhi poshtë këtë e-mail dhe e cilësoi fake-news.
