Zëvendësdrejtori i RAI-t, Sigfrido Ranucci, i është përgjigjur deklaratave të bëra nga Kryeministri Edi Rama në lidhje me reportazhin ku emisonin “Report” në Rai 3 hidhte akuza të forta ndaj Sekretarit të Përgjithshëm të Këshillit të Ministrave Ëngjëll Agaçi, duke thënë se emisioni nuk është kundër shqiptarëve. Ai shprehet se emisioni investigativ do vijojë të dielën. (lexo këtu)
“Këtë duhet ta them qartësisht. Nuk është një sulm ndaj popullit shqiptar, që sipas meje është shumë i afërt me ne. Absolutisht nuk duhet të përgjithësojmë. Është një transmetim shumë kritik, por ne nuk duam të përgjithësojmë. Ne kemi folur për çështje me emra dhe mbiemra. Kur ka përgjegjësi penale, ka emra dhe mbiemra. Nuk është sulm për popullin shqiptar, për Shqipërinë. Fakti që është përdorur Rama dhe Shqipëria për të sulmuar Melonin nuk është aspak i vërtetë. Sikurse nuk e keni parë, as nga ana e qeverisë italiane, as nga qeveria shqiptare, nuk kemi pasur fatin që të bashkëbisedojmë me ta dhe të sqarojmë faktet” – tha Ranucci.
Ndër të tjera në një intervistë për “Syri Tv”, Rannuci shprehet se e fton Ramën në emision, ndërsa mohon akuzat për presion.
“Unë i adhuroj gjyshet. Gjithmonë kam shkuar mirë me gjyshet e mia. Respekt që ka përmendur gjyshen Rama, por ky mendim i gjyshes nuk mund të perceptohet si presion. Unë nuk e marr si presion. Mendoj se Rama i ka thënë ato gjëra në interesin ekskluziv të Shqipërisë, për të krijuar tensione mbi shtypin e lirë të një vendi tjetër se kjo do ishte e rëndë po ta bënte. Ndërkohë Rama me gjithë respektin duhet të dijë se nëse “Report” zotëron informacione që janë në interesin publik të këtij vendi, por edhe të shqiptarëve si popull, Rama mund të mbështetet në kontributin e “Report”, në kuptimin që në një program që do vazhdojë të bëjë punën e vet, do ishte një gjest i bukur nga ana e Ramës nëse do pranonte të bënte intervistën me ne” – deklaroi gazetari italian.
